Во периодот од 31 август до 1 септември, до 7:30 часот, во земјава се регистрирани вкупно 26 пожари на отворен простор, информира Центарот за управување со кризи (ЦУК).
Од нив, два пожари се активни, четири се под контрола, а 20 се целосно изгаснати.
Активни се пожарите во Општина Сарај, на потегот од селото Копаница кон Радуша, каде гори нискостеблеста шума и ниска вегетација, и во Општина Штип, на просторот меѓу селата Селце, Пухче, Степанци и Лакавица, каде гори ниска вегетација.
Под контрола се пожарите во Општина Македонски Брод, кај селата Битово, Заград и Страјане, како и кај селото Драгов Дол. Во првиот случај зафатени се нискостеблеста шума, ниска вегетација, пасишта и папрат, додека кај Драгов Дол гори ниска вегетација и шума.
Пожар е ставен под контрола и на градската депонија Острец во Делчево, како и над селото Палиград во Општина Зелениково, каде е зафатена мешана шума.
Меѓу 20-те изгаснати пожари има интервенции на повеќе локации низ земјава. Пожари биле регистрирани во Гази Баба, Врапчиште, Кичево, Ресен, Прилеп, Долнени, Струга, Чашка, Ново Село, Старо Нагоричане, Боговиње, Желино, Кавадарци и Свети Николе.
Во најголем дел станува збор за пожари на ниска вегетација, грмушки и стрништа, но на одделни места биле зафатени и борова или мешана шума.