Управата за финансиска полиција поднела кривична пријава против поранешниот генерален директор на АД „Пошта на Северна Македонија“, Ј.М., поради сомнение за злоупотреба на службената положба и овластување. Како што наведуваат оттаму, пријавата е поднесена зашто не постапил по одлуките за исплата на долгови кон две фирми, па како последица на тоа, на Пошта ѝ била предизвикана штета од речиси 11 милиони денари по основ на казнени камати.
Кривичната пријава, како што инфомираат во Финансиаката полиција е поднесена до Основното јавно обвинителство Скопје, поради постоење основи на сомнение за сторено кривично дело „Злоупотреба на службената положба и овластување“, предвидено во член 353 од Кривичниот законик.
„Во периодот од 2021 до 2022 година, пријавениот, постапувајќи спротивно на Статутот на друштвото и Законот за трговските друштва, не презел дејствија за реализација на одлуки и заклучоци на Управниот одбор за исплата на парични обврски кон два правни субјекта во вкупен износ од 19.292.984,00 денари“, наведено е во соопштението.
Во него се додава дека и покрај тоа што на Ј. М. му биле доставени потребните документи за исплата, пријавениот не ја потпишал спогодбата за исплата на долгот, не ги потврдил фактурите и не ги потпишал налозите за плаќање.
„Со ваквото постапување овозможил против друштвото да бидат поведени судски постапки, по што со судски пресуди биле утврдени обврски за плаќање казнена камата. На овој начин, на АД „Пошта на Северна Македонија“ ѝ била предизвикана вкупна штета од 10.968.483,00 денари по основ на казнена камата“, се додава во соопштението.