Од ноември баките ќе го менуваат платните налози, ознаките за целта на плаќањето и начинот на означување на платежните сметки, но нема да се менува бројот на сметките на граѓаните, информираат од Македонската банкарска асоцијација и посочуваат дека се работи за модернизацијата на платните системи во земјата.
Од асоцијацијата информираат дека при плаќање, платежната сметка ќе се користи во ИБАН – формат, односно со додавање на ознаката МК07 пред постојниот број на сметката, а приспособувањето во електронското и мобилното банкарство ќе го направат банките.
Ќе започне и примена на нови, стандардизирани платни налози, кои ќе ги заменат досегашните обрасци ПП10, ПП30, ПП40, ПП50 и ПП53. Новите обрасци ќе се користат и во хартиена и во електронска форма.
Промена ќе има и кај ознаките за целта на плаќањето, осносно досегашните нумерички шифри ќе бидат заменети со нови четиризнаковни ознаки, со што ќе се овозможи попрецизно наведување на намената на плаќањето и подобра обработка на податоците.
„Компаниите кои користат автоматизирана размена на налози, сметководствени и или други интегрирани решенија, кај кои може да бидат потребни соодветни приспособувања, ќе бидат информирани од страна на банките, согласно законските рокови и насоките од регулаторот. Промените се дел од процесот на понатамошно стандардизирање и модернизирање на националниот платен промет, подобрување на квалитетот и структурираноста на податоците и создавање услови за поефикасна обработка на платежните трансакции“, велат од МБА.
Од асоцијацијата апелираа до граѓаните и компаниите да ги следат известувањата и практичните упатства што ќе ги објавуваат нивните банки во однос на новите платни налози, користењето на ИБАН и другите промени поврзани со примената на новите стандарди.