Претседателот на Украина Володимир Зеленски и претседателот на Србија Александар Вучиќ денеска одржија средба во Палатата Србија, каде што се одржа состанок помеѓу делегациите на двете земји, пренесува Н1.
Свечената церемонија започна во 10:30 часот, по што Зеленски разговараше со претседателот на Србија, Александар Вучиќ, и делегациите на двете земји. По состанокот, тие се обратија пред медиумите.
Србија и Украина денеска во Белград потпишаа Меморандум за соработка во областа на здравјето на животните и безбедноста на храната.
Меморандумот за разбирање меѓу српското Министерство за земјоделство, шумарство и водостопанство и украинската Државна служба за безбедност на храната и заштита на потрошувачите беше потпишан од страна на српскиот министер за земјоделство, шумарство и водостопанство Драган Гламочиќ и украинскиот амбасадор во Белград, Александар Литвињенко.
Пред потпишувањето на Меморандумот, претседателите на Србија и Украина, Александар Вучиќ и Володимир Зеленски, одржаа билатерална средба, за која Вучиќ претходно најави дека ќе се разговара за европските интеграции, како и за билатералната економска и енергетска соработка.
Посетата долго време беше најавувана, а Зеленски дојде во Србија три недели по самитот Украина-Југоисточна Европа во Киев, на кој присуствуваше претседателот Вучиќ, но како единствен учесник не ја потпиша заедничката декларација.
Украинскиот претседател Володимир Зеленски изјави дека се благодарни што Србија ќе обезбеди нов пакет хуманитарна помош за Украина, особено во областите на здравството и енергетиката.
Тој истакна и дека напредуваат преговорите за договорот за слободна трговија меѓу Русија и Србија.
Александар Вучиќ се обидува со посетата на Володимир Зеленски на Белград да испрати порака до Берлин и Брисел, и тоа во пресрет на изборите во Србија, смета Душко Лопандиќ, поранешен дипломат и потпретседател на партијата Србија Центар (СРЦЕ).
Тој додава дека и овој пресврт, како и секој потег на актуелната власт, е „тактички, краткотраен и лишен од вистинска стратегија“. Сепак, смета дека Вучиќ од својот украински колега би можел да побара и одредена услуга.
Претседателот на Србија, Александар Вучиќ, по средбата со украинскиот колега Володимир Зеленски и потпишувањето на Меморандумот за разбирање во областа на земјоделството, изјави дека значително е зголемено нивото на трговската размена меѓу Србија и Украина, додавајќи дека се надева оти соработката ќе биде уште подобра.
Александар Вучиќ повтори дека Србија ја поддржува територијалната целовитост на Украина и дека е благодарна што поддршката е заемна. Тој истакна и дека двете земји се поддржуваат меѓусебно на патот кон Европската Унија.