На заедничката прес-конференција, министерот Шикорски ја истакна силната и принципиелна поддршка на Полска за европската интеграција на Македонија и регионот, нагласувајќи дека интеграцијата на Западен Балкан претставува „недовршена работа“ за Европската Унија.
„Интеграцијата на Западен Балкан ја сметам за недовршена работа. Европа треба да биде целосна и слободна, а Западен Балкан треба да биде дел не само од нашиот сојуз на кој веќе сме членови, туку и од нашето европско семејство. На оние што се сомневаат во процесот или во неговата цел, им порачувам да си постават прашање: што би сакале да бидат – граѓани на Европската Унија, со владеење на правото, предвидливост, фер судови и стабилна внатрешна и надворешна политика, или дел од алтернативни интеграциски процеси?“, истакна Шикорски.
Полскиот министер го нагласи и придонесот на Македонија во поддршката на Украина, оценувајќи ја како значајна и солидарна во клучните моменти од почетокот на конфликтот.
Министерот Муцунски нагласи дека процесот на проширување не беше потпомогнат од постојаниот бран на билатерализација, што, како што истакна, ја попречи доследната политика на проширување и претставува еден од клучните предизвици за напредокот на земјата.
„Накратко, ќе го направиме нашиот дел од домашните реформи. Како Влада силно ја испорачуваме реформската агенда и целосно сме усогласени со заедничката надворешна и безбедносна политика на Европската Унија. Ова не го кажувам од позиција на пркос, туку од позиција на самопочит. Она што го бараме и очекуваме е предвидливост на тој пат и почит кон нашиот јазик, идентитет и нашиот поглед на историјата“, истакна Муцунски.