Малолетник на 15 години од селото Боговиње, вчера бил донесен во Клиничкиот центар во Тетово со прострелна рана во пределот на стомакот. Од болницата случајот бил пријавен во полиција, каде што подоцна се самопријавиле С.М.(42) и неговиот 16-годишен син, двајцата од Боговиње, кои предале пиштол со една празна рамка.
Според изјавата на С.М., настанот се случил околу пладне во селото, кога од невнимание дошло до испукување на еден куршум од пиштолот, кој го носел неговиот малолетниот син. Извршен е увид во присуство на јавен обвинител од ОЈО Тетово и претставници од Центарот за социјални работи Тетово. Малолетникот е задржан за понатамошна постапка и се преземаат мерки за целосно расчистување на случајот, по што ќе следува соодветна пријава.