Скопјани почнаа да дишат загаден воздух и пред почетокот на грејната сезона. Деновиве, со намалувањето на температурите, концентрациите на ПМ 2,5 честичките во повеќе општини ја надминуваат максимално дозволената граница, а високи се вредностите и на ПМ 10 честичките. Според податоците од Државниот автоматски мониторинг систем за квалитет на воздух на Министерството за животна средина, во последните три дена концентрациите на ПМ 2,5 биле повисоки од 25 микрограми на кубен метар на две од четирите локации каде што се мерат, во Гази Баба и во Карпош, а државниот мониторинг во моментот не дава податоци за мерните места кај Ректорат, Лисиче и Ѓорче Петров.
Загадување со ПМ 2,5 над дозволените граници во последните денови регистрираат и мерните места во Гостивар и Куманово. Во Тетово, пак, вредностите достигнуваат и до 39 микрограми, а овој град, деновиве е шампион и по концентрации на ПМ 10 кои надминуваат 75 микрограми на кубен метар. Во Скопје, пак, мерните места Лисиче и Ректорат деновиве регистрирале најголемо загадување на воздухот со ПМ 10, речиси на максималната граница од 50 микрограми.
Според податоците од Министерството за животна средина, среднодневната вредност за РМ 10 не смее да надмине 50 μg/m³ повеќе од 35 пати во календарската година, а просечната годишна вредност не смее да надмине 40 μg/m³.
Сепак, лани на сите мерни места во земјава, освен во Лазарополе, биле загадени повеќе од 35 дена во годината. Најлошо било во Струмица, каде 108 денови имало загадување со среднодневна вредност над максимумот од 50 микрограми. Слично било и во Кавадарци и Кичево со 105 денови, Лисиче 104 и Центар со 101 ден.
Што се однесува до просечната годишна концентрација на ПМ 10, таа е надмината на девет мерни места, од вкупно 17 за кои Државниот мониторинг има податоци. Највисока била во Лисиче 49 микрограми на кубен метар, во Кичево 47, Струмица 46,9 и во Кавадарци 46 микрограми.
Просечната годишна вредност на PM2.5, пак, не смее да надмине 25 µg/m³. Сепак, во 2025 година, покажуваат анализите од Државниот моноторинг, на десет локации низ земјата, од вкупно 18 каде што се мерат ПМ 2,5 оваа вредност била надмината. Најзагадено било во Кичево со просечна вредност од 31 миктограми, Струмица со 29 и Гостивар со 27 микрограми. Во Скопје, највисока просечна концентрација на ПМ 2,5 во минатата година била измерена во Лисиче, 27,7 и во Карпош 26,6 микрограми.