Во моментов во земјава има најмалку 20 активни пожари на отворен простор, а критичен е пожарот кој избил попладнево кај струмичките села Баница и Водоча, информираат во Дирекцијата за заштита и спасување.
„Пожарот брзо почнал да се шири, а противпожарните служби од Гевгелија, Валандово, Радовиш и Струмица воспоставуваат контрола. Активирана е механизација која прави противпожарни пресеки за да не се шири огнот. Нема изгорени куќи и нема повредени лица. Бројот на пожари ќе расте во наредните денови заради високите температури“, изјави директорот Стојанче Ангелов.
Пожар има и во Цветово, Студеничани, како и во општина Желино кај Церово, потоа, кај Тајмиште, како и во Врапчиште, Маврово-Ростуше, во Прилеп и село Бонче.