Информацијата дека подолго време не е на работа неодамна ја потврди и премиерот Христијан Мицкоски. „Со Фетаи се видовме пред неколку недели и во разговор ми рече дека тој повеќе не се гледа во овој состав на владата кој јас го предводам“, рече премиерот и додаде дека од Фетаи добил барање дека сака да се врати во Брисел, од каде што дојде на предлог на Вреди да биде вицепремиер. „Јас му предложив дека би сакал да го искористиме да работи нешто за Владата, односно да биде наш специјален преставник во Брисел. Размислувам како да го ангажираме“, рече Мицкоски.
Неговите актуелни и бивши сопартијци од Алијансата за Албанците први објавија дека Фетаи не оди на работа. Министерот за здравство Азир Алиу рече дека повеќе од еден месец не дошол на владина седница.
Пред 15 дена на официјалниот владин фејсбук профил Фетаи напиша дека не е согласува со одлуката на коалицијата Вреди, по обединувањето во една партија да имаат двајца партиски лидери.
„Јас не се согласувам со двоглавиот модел на лидерство на Вреди. Имаме суштински разлики. Овој став не беше мој како Арбен, туку колективна едногласна одлука на Алијансата на Албанците, вклучувајќи го пратеникот Муса и министерот Алиу. Што ги мотивираше моите сопартијци да го прифатат овој модел преку ноќ, без дебати и без нова одлука во Управниот совет на АА, треба тие самите да си кажат. Секогаш сум се водел и ќе продолжам да се водам од моите убедувања и принципи, а не од моменталните интереси или ниските политички пресметки… Сојузот на Вреди не треба да се според имиња, туку врз јасна визија, дефинирани вредности, принципи и правила, без наметнување, без брзање и без предавство. Вистината доаѓа само со факти, а не со инсинуации. Отворен сум за секаква дебата заснована на аргументи. Немам никакви несогласувања со лидерите на Вреди, Изет Меџити, Билал Касами, Беким Сали и Беким Ќоку“, напиша на својот фејсбук-профил Фетаи.