Трибуналот за воени злосторства во Косово денеска ќе ја објави пресудата за поранешниот претседател Хашим Тачи и неколку команданти од времето на војната, обвинети за убиства и тортура за време на насилното отцепување на територијата од Србија во 1990-тите години.
Обвинителите бараат казни од 45 години затвор за Тачи (58) и за тројца други поранешни команданти на етнички албанската Ослободителна војска на Косово (ОВК), која се бореше против српските сили. Обвинетите ги негираат сите обвиненија.
Пресудата внимателно ќе се следи во Косово и во Србија, каде што наследството од конфликтот во 1998-1999 година и прогласувањето независност на Косово во 2008 година остануваат извор на тензии меѓу косовските Албанци и Србите.
Тачи и понатаму е почитувана личност за многу косовски Албанци, додека самиот трибунал е крајно непопуларен во Косово.
Во многу градови низ Косово се поставени големи екрани кои го одбројуваат времето до пресудата, а на главните улици се истакнати знамиња на ОВК.
Полицијата соопшти дека се направени подготовки заедно со странските мировни сили за случај протестите да прераснат во насилство. Амбасадите на САД и на неколку други земји им препорачаа на граѓаните да избегнуваат собири на луѓе.
Обвинителите во Хаг изјавија дека повеќе од 100 политички противници и лица сметани за соработници на српските безбедносни сили биле убиени од силите на ОВК за време на конфликтот.
Адвокатите на Тачи тврдат дека обвиненијата се неосновани и претставуваат обид за прекројување на историјата. Тие изјавија дека не постојат докази кои директно го поврзуваат Тачи со кое било од наводните злосторства или врз основа на кои би можело да се заклучи дека тој имал контрола врз другите команданти на ОВК.
Специјализираните совети на Косово, со седиште во Хаг, беа формирани во 2015 година под меѓународен притисок, со цел да им се суди на поранешните борци на ОВК за наводни воени и повоени злосторства.
