Во текот на денешниот ден се регистрирани нешто повеќе од пет пожари на отворен простор. Според директорот на Дирекцијата за заштита и спасување (ДЗС), Стојанче Ангелов, ниту еден од нив не претставува посериозна закана, а се очекува пожарите наскоро да бидат ставени под контрола. Ангелов ова го соопшти преку видеоизјава од терен.
Како што информираше директорот на ДЗС, во текот на вчерашниот ден биле изгаснати повеќе од 25 пожари на отворен простор. Најкомплексен бил пожарот на територијата на Општина Македонски Брод, во близина на Самоков.
„Пожарот навлезе на тешко пристапен терен каде што интервенираа голем број пожарникари од Македонски Брод и три пинцгауери на Дирекцијата за заштита и спасување. Конечен удар на пожарот му зададе дождот што заврна на ова подрачје во текот на вчерашното попладне“, изјави Ангелов.
Вчера бил регистриран и поголем пожар во Општина Новаци, при што изгорела поголема површина рамничарски предел. Пожарот бил запрен и изгаснат благодарение на интервенцијата на пожарникарите, локалната самоуправа и земјоделците, кои помогнале со механизација.
Според информацијата на Центарот за управување со кризи (ЦУК), до 13 часот денеска на територијата на државата биле регистрирани вкупно шест пожари на отворен простор. Од нив, два се активни, додека четири се изгаснати.
Активни се пожарите кај селото Брњарци во Општина Арачиново и во населбата Волково во Општина Ѓорче Петров, каде што гори ниска вегетација. Изгаснати се пожарите во селото Бањица во Општина Чашка, селото Биџево во Општина Струга, селото Сенакос во Општина Врапчиште и на депонијата во Делчево, информира ЦУК.
Ангелов им се заблагодари на македонските пожарникари за брзата реакција, како и на граѓаните за внимателноста. Сепак, тој нагласи дека постојат докази и за неколку намерно предизвикани пожари.
„Апелирам до граѓаните и понатаму да бидат совесни и внимателни за ненамерно да не предизвикаат пожар. Секое сомнително однесување да се пријави на бројот 112 или во најблиската полициска станица“, порача Ангелов.
Во однос на состојбата со водоснабдувањето во Гостивар, директорот на ДЗС информираше дека последните анализи покажуваат подобрување на квалитетот на водата во споредба со претходните мерења. Сепак, потребно е дополнително време пред водата да биде прогласена за безбедна за пиење.