„Сигналите што доаѓаат оттаму не ме прават оптимист. Напротив. Еве видовме еден преседан во дипломатијата кога излезе дипломатска нота за тридневен престој на мојата сопруга со мојот помал син кај наши паријатели, во Пампорово, нешто што е невообичаена пракса во светот на дипломатијата и можеби единствена како таква. Замислете сега ние да ги вадиме сите дипломатски ноти коишто ги испраќаат од нашиот источен сосед и практично во тие дипломатски ноти пишуваат работи коишто можеби исто така би биле интересни за јавноста“, изјави вчера Мицкоски.
Тој вели дека за овој случај веќе ги информирал партнерите на Македонија во НАТО бидејќи со објавувањето на дипломатската нота, како што кажа, се загрозува безбедноста на неговото семејство. Тој им се извини на сопругата и на помалиот син што „мора сето ова да го трпат“.
„Ова се аматерски потези, нејасни, неразуми и не одат во насока на подобрување на односите меѓу двете земји. Ние остануваме фокусирани на тоа што е наша задача, а тоа е да испорачуваме за Реформската агенда, да ги правиме реформите дома, да ја градиме економијата, да растеме… Тоа е она што претставува наша задача како влада, тие нека си ја тераат својата работа, ние работата за која сме бирани од граѓаните, а тоа е да испорачуваме проекти и да решаваме проблеми“, рече Мицкоски.
Со дипломатската нота, за која говори Мицкоски, македонската амбасада во Софија го информира Министерството за надворешни работи на Бугарија дека сопругата и еден од синовите на премиерот ќе патуваат во Пампорово, Бугарија. Известувањето е од 6 јануари годинава, а се однесува на патување два дена подоцна, односно на 8 јануари.
Овој документ минатата недела беше објавен од група на социјалните мрежи „Грубовци, Ениџе Вардар – родна Македонија“, а пред два дена на него се повика веб-портал, кој направи споредба меѓу ставовите на Мицкоски за спорот со Бугарија и патувањето на неговото семејство во Пампорово.
Во документот објавен од оваа група на социјалните мрежи, покрај датумот на патувањето, е наведено приближното време кога сопругата и помалиот син на Мицкоски ќе ја преминат границата меѓу Македонија и Бугарија, како и детали за нивното обезбедување – имињата на неговите членови, возилата со кои патуваат, комуникациските уреди и вооружувањето што го носат со себе.