Три победи по ред трае серијата на Силекс во Првата македонска фудбалска лига. Откако претходно влегоа во мала „криза“, сега кратовскиот тим ја има најдобрата форма од сите екипи во последните три кола, а денеска за противник ја има екипата на АП Брера, во надеж дека ќе продолжи со победничката серија.
Седум бода е разликата од Струга ТЛ на третото место, а од кратовскиот тим најавуваат дека ќе се борат до крај и додека има шанси за место погоре на табелата.
„Радува добрата форма во нашиот тим, и сега посакуваме оваа победничка серија да потрае. Се додека имаме шанси за тоа трето место, ние ќе се бориме до крај. Играме против АП Брера, тим кој има мотиви да се бори за опстанок, но имаме и ние мотиви да освојуваме бодови за да се пласираме место погоре на крајот од првенството. За нас денешниот меч е како сите останати, одиме по нашата цел да ги освоиме бодовите, да ја играме нашата игра, да ги исполниме задачите од стручниот штаб и се надевам дека тоа ќе биде доволно на крај да стигнеме до победа“, рече голманот на Силекс, Љупче Џеков.
АП Брера има една победа на последните пет натпревари во Првата лига, па фудбалерите на Мартин Алаѓозовски се надеваат дека денеска во Кратово би можеле да се вратат во триумфален ритам, иако знаат дека гостувањето кај Силекс е навистина сериозен предизвик. Но, струмичани имаат своја цел, да го избегнат баражот и да обезбедат директен опстанок во елитата.
„На последните два меча ремизиравме, а бодови ни се потребни за да ја оствариме нашата цел. Имаме респект за Силекс, кој повторно ја пронајде својата добра форма, но ние посакуваме успех на ова гостување во Кратово. Нема да биде лесно, но ќе сториме сѐ да ја оствариме нашата цел“, порачува стратегот на АП Брера, Мартин Алаѓозовски.
The post Силекс сака нова победа во битката за третото место, Брера доаѓа со свои планови во Кратово appeared first on sportsport.mk.