Лидерот на ДУИ, Али Ахмети во обраќањето пред присутните силно го искритикува доскорешниот сопартиец и противкандидат за градоначалник од коалицијата Вреди и рече дека сега е време на нови лица, како што е кандидатот на НАИ, Ваљбон Лимани.
„Не ми е мило што Невзат Бејта заврши лошо. Тој застана на погрешна страна, со оние што не го ценат ниту неговото семејство. Како ќе го оправда Невзат Бејта својот избор пред новата генерација? Новите генерации ќе одат напред“, рече Ахмети.
Тој кажа дека нема две лица и искрените луѓе се со него и затоа, додаде, ја направиле коалицијата, која, како што нагласи, е мисија, а заради таа мисија Арбен Таравари ја напушти функцијата.
„Овој пат е победоносен во Гостивар и добро е да не се зазема страна ниту за ВМРО ниту за СДСМ,“ заклучи Али Ахмети.
Арбен Таравари, лидерот на крилото на Алијанса за Албанците кое се приклучи на ДУИ на овие избори, оцени дека на претходните локални избори Ваљбон Лимани е најубедливиот победник во државата и дека само за 21 глас не победи во првиот круг. Таравари најави дека оваа година ќе има предвремени парламентарни избори.
„Годината 2026-та ќе биде уште една изборна година со предвремени парламентарни избори и ќе мора да постигнеме нов договор меѓу двата етникуми, меѓу Македонците и Албанците. Многу сум горд што ја основавме коалицијата АКИ. В недела, да излеземе и да гласаме за Ваљбон и нека резултатот биде извонреден и нека тој (Невзат Бејта) не се кандидира повторно во 2029 година“, рече Таравари.
Кандидатот за градоначалник кој е поддржан од коалицијата НАИ, Ваљбон Лимани се заблагодари за поддршката, која како што рече, ја добил за време на кампањата. Лимани оцени дека победата му била одземена на нечесен начин.
„Пробаа експеримент добро познат на гостиварци, кој им се врати како бумеранг, па затоа вечерва имам посебна благодарност до сите оние што наметнаа втор круг во Гостивар, бидејќи нè кренаа уште повеќе на нозе и оваа втора фаза донесе уште повеќе луѓе, правејќи народот да застане заедно. Со контроверзна одлука беше одлучено да има втор круг во Гостивар, и покрај фактот дека јас победив со многу голема разлика, многу луѓе се чувствуваа лошо. Едвај чекам да славам на плоштадот во недела и да започне денот на победата денес“, рече Лимани.
Од говорницата на митингот во Гостивар зборуваа и пратениците Халил Снопче, Талат Џафери и претседавачот на советот, кој на локалните избори беше носител на листа на НАИ, Валдет Џафери.