Македонскиот одбојкарски освојувач на Купот, екипата на Штип УГД денеска патува за Норвешка, каде утревечер ќе го одигра својот деби натпревар на европската клупска сцена. Штипјани кои во последните две сезони покажаа рапиден напредок на домашната сцена, годинава решија да се обидат и на европската, со учество во третото по ранг ЦЕВ натпреварување, Челинџ Купот.
Ждрепката сакаше нашиот вицешампион во првата рунда од квалификацискиот дел за противник да го добие непознатиот норвешки состав Кол Ил. Следејќи ги приликите, Штип ИГД се надева дека предноста на реваншот на домашен терен може да биде и пресуден на патот да се помине првото коло.
„Со нетрпение го очекуваме нашиот прв европски натпревар. Оптимисти сме во двомечот против Кол Ил, од причина што и на двете екипи ова е прв настап на европска сцена. Екипата на Кол е доста искусна екипа составена од квалитетни домашни играчи. Играат доста дисциплинирана скандинавска одбојка. Нашата екипа, иако доста помлада во однос на противничката е составена од домашни репрезентативци и две странски засилувања, сите со меѓународно искуство, секогаш мотивирана и спремна да се докажува што повеќе, па оттаму сметам дека шансите се 50-50 за двете екипи. Патуваме комплетни. Играчите се спремни и здрави“, ни изјави пред заминување, стратегот на вицешампионот, Кристиан Ристески.
Натпреварот во Осло утре е закажан со почеток во 19 часот. Реваншот ќе биде следната недела во салата „25 Мај“ во Радовиш.