Министерот за надворешни работи Тимчо Муцунски информира дека на маргините на Меѓународната конференција за Коридорот VIII во Софија се сретнал со својата бугарска колешка Велислава Петрова-Чамова. Според Муцунски, средбата била конструктивна и во позитивен дух, но, како што рече, позициите на двете страни и натаму остануваат значително оддалечени.
Министрите разговарале за билатералните односи, евроинтеграциите и недовербата меѓу Скопје и Софија и Акцискиот план за малцинствата.
„Во однос на европската интеграција, постои висок степен на недоверба, која од наша перспектива е поврзана со предвидливоста на процесот и со досегашното искуство со билатералните барања. Разговаравме и за продолжување на дијалогот меѓу двете држави во периодот што следи, и покрај постојните разлики во позициите. Нагласив дека прашањата поврзани со идентитетот, историјата и културата не смеат да претставуваат пречка на европскиот пат. Без дијалог не може да се дојде до решение, но самиот дијалог не е гаранција за надминување на разликите“, вели Муцунски.
Според бугарската министерка Петрова-Чамова Бугарија ја поддржува европската перспектива на Македонија, но во процесот, кој е утврден со правила и критериуми, ниту една земја членка не може да гарантира какви било идни чекори. Таа посочи дека Македонија мора да ги направи уставните измени.