За време на посетата на Сасекс, принцезата од Велс, Кејт Мидлтон, откри дека особено ужива во една домашна обврска: миењето садови.
Додека разговараше со членови на локалната заедница, таа призна дека миењето садови воопшто не ѝ пречи. Овој неочекуван детал од нејзиното секојдневие таа го сподели со 75-годишната Линда Џонс. „Сакам да мијам садови. Навистина уживам во тоа“, изјави принцезата, како што пренесе списанието „Хелоу“.
Кога ја прашаа дали принцот Вилијам ѝ помага, таа откри како ги делат обврските. „Тој ги брише садовите. Ние сме добар тим. Ги вклучуваме и децата“, рече Кејт. Со тоа таа откри дека принцот Џорџ, принцезата Шарлот и принцот Луис исто така учествуваат во миењето и бришењето на садовите.
Се чини дека Кејт Мидлтон не е единствениот член на британското кралско семејство што ужива во оваа домашна обврска. Наводно, и покојната кралица Елизабета Втора сакала да мие садови по оброците. Оваа приказна ја сподели кралскиот биограф Валентин Лоу во подкастот „A Right Royal Podcast“ на списанието. Тој е и автор на книгата „Power and the Palace“ (Моќта и палатата).
Според него, приказната потекнува од Алекс Алан, кој служел како приватен секретар на поранешниот британски премиер Џон Мејџор. Традиционално, британскиот премиер еднаш годишно поминувал викенд во Балморал, придружуван од својот приватен секретар. Овие собири биле многу поопуштени од формалните кралски настани. Често се организирале скари, при што принцот Филип и принцот Ендрју најчесто се грижеле за готвењето. По оброкот, кралицата наводно ги миела садовите.
„Добро е познато дека кралицата потоа ги миела садовите. Луѓето веднаш станувале за да ѝ помогнат, но им било кажано дека таа ужива во тоа. На пример, Алекс Алан еднаш станал за да помогне, но му рекле: ‘Не, не, кралицата ужива да го прави тоа’“, раскажа Лоу. Приказната има и еден хумористичен додаток: Лоу откри дека една од дворските дами еднаш му кажала оти садовите што Кралицата веќе ги измила на рака, потоа повторно се миеле во машина за садови.