Во првите седум месеци од 2026 година, Македонија ја посетиле вкупно 741 446 туристи, при што е забележано зголемување на бројот на странските туристи. Меѓу најбројните странски гости се туристите од Турција, Германија, Србија, Романија и Албанија.
Од Министерството за култура и туризам велат дека овие резултати ја нагласуваат важноста на континуираната промоција на Македонија, унапредувањето на квалитетот на туристичките услуги и развојот на автентична, одржлива и конкурентна туристичка понуда, во согласност со потребите на современите туристи.
„Владата и Министерството за култура и туризам го препознаваат туризмот како значаен фактор за економскиот и општествениот развој на државата. Нашата визија е Македонија да се позиционира како препознатлива меѓународна туристичка дестинација преку вреднување и промоција на богатото културно и природно наследство, развој на квалитетни и одржливи туристички производи и услуги, како и примена на современи дигитални решенија“, велат од Министерството, по повод Светскиот ден на туризмот што годинава се одбележува на тема „Дигиталната агенда и вештачката интелигенција за редизајнирање на туризмот“.
Темата ја нагласува сè поголемата улога на современите технологии и иновациите во обликувањето на туристичкиот сектор, при што човекот и автентичното туристичко искуство остануваат во центарот на вниманието. Вештачката интелигенција и дигитализацијата отвораат нови можности за поефикасно управување со туристичките дестинации, подобро планирање и создавање поиндивидуализирани, поинклузивни и поквалитетни туристички искуства.