Од полноќ стапуваат на сила новите максимални малопродажни цени на нафтените деривати, согласно одлуката на РКЕ.
Според одлуката, од 22 септември во 00:01 часот бензините „Еуросупер БС-95“ и „Еуросупер БС-98“ ќе се продаваат по максимална цена од 99, односно 101 денар за литар. Во однос на претходната одлука, нивните цени се намалуваат за 1,50 денар за литар.
Значително зголемување има кај дизел-горивото. „Еуродизел БС“ ќе чини најмногу 104,50 денари за литар, што е зголемување од 5,50 денари за литар.
Цената на екстра лесното масло за домаќинство „ЕЛ-1“ се намалува за 7 денари и од полноќ ќе изнесува најмногу 102,50 денари за литар.
Кај мазутот „М-1 НС“ е утврдена максимална цена од 50,078 денари за килограм, што претставува зголемување од 1,835 денари за килограм.
Од РКЕ информираат дека во пресметката се земени предвид повисоките референтни цени на нафтените деривати на светскиот пазар, кои во однос на претходната пресметка се зголемиле кај бензините за 0,960 проценти, кај дизелот за 6,772 проценти, кај екстра лесното масло за 5,960 проценти и кај мазутот за 4,084 проценти.
Во пресметката е земен предвид и курсот на денарот во однос на доларот, кој во изминатиот период е повисок за 0,753 проценти.
При формирањето на цените е применет намален износ на акцизата од 4 денари за литар кај бензините „Еуросупер БС-95“, „Еуросупер БС-98“, „Еуродизел БС“ и екстра лесното масло за домаќинство. Кај дизелот и екстра лесното масло е применет и намален износ на ДДВ од 10 проценти.
РКЕ нагласува дека утврдените цени се максимални. Трговците на големо и мало можат да ги формираат цените на одделни нафтени деривати и горива за транспорт и пониско од максимално утврдените.