Лице од Скопје, вработено во Службата за општи и заеднички работи при Владата, е лишено од слобода откако, според пријавата до полицијата, побарало 1.500 евра за посредување при вработување во Град Скопје, пренесуваат од Министерството за Внатрешни Работи.
Одделот за сузбивање на организиран и сериозен криминал – Единицата за корупција при Министерството за внатрешни работи до надлежниот јавен обвинител од Основното јавно обвинителство за гонење на организиран криминал и корупција поднесе кривична пријава против Д.Ц. (49) од Скопје.
Од МВР информираат дека тој се сомничи за сторено кривично дело „Примање награда за противзаконито влијание“, казниво по член 359 став 7 во врска со став 2 од Кривичниот законик.
Постапката започнала по претходно поднесена пријава од граѓанин, кој пријавил дека од него биле побарани пари за да му биде овозможено посредување при вработување во Град Скопје.
Според пријавата, Д.Ц. побарал вкупно 1.500 евра, при што 500 евра требало да бидат исплатени како прва рата. Како што соопштува полицијата, тој на пријавителот му посочил дека познава лица кои можат да влијаат врз постапката за вработување.
По добиената пријава, Единицата за корупција, во координација со надлежниот јавен обвинител, веднаш презела мерки и активности со цел документирање на наводното кривично дело.
На 4 септември 2026 година, околу 17:50 часот, на подрачјето на Скопје, пријавителот му предал на Д.Ц. 500 евра, односно пет банкноти во апоени од по 100 евра. Парите претходно биле криминалистичко-технички обработени за потребите на постапката.
По предавањето на парите, полициски службеници извршиле контрола во службеното возило на пријавениот. При контролата биле пронајдени паричните средства, а одземен бил и мобилниот телефон што го користел Д.Ц.
Лицето било лишено од слобода, а против него е поднесена кривична пријава до надлежното обвинителство. Понатамошната постапка ќе ја водат надлежните институции.