Премиерот Христијан Мицкоски денеска во Прилеп изврши увид во градежните активности за реконструкција на водоводната мрежа на улицата „Кузман Јосифовски“ и изградбата на кружниот тек кај мостот „Табана“.
По посетата на градежните активности, Мицкоски одговараше на прашања на медиумите, а ја коментираше и опозицијата.
„Јас сум свесен дека имаме работа со талог во опозицијата. Тие така се препознаа. Јас не кажав дека тоа се однесува на нив, само спомнав во едно друго интервју дека, за жал, има една мала група во општеството која се обидува преку лаги, конструкции и измислици да внесе немир и недоверба кај општеството. Јас таа група ја нареков талог“, изјави Мицкоски.
Тој додаде дека не знае од кои причини опозицијата се препознала во неговата изјава, но оцени дека тоа „од сега па понатаму ќе ги прати“.
„Тој талог треба да ја прифати оваа реалност, да проба да излезе од безидејноста во која се наоѓа ако сака да биде конкурентна понатаму на политичката сцена. Тоа е впрочем, на крајот на денот нивен проблем“, рече премиерот.
Мицкоски посочи дека власта има јасна цел и се обидува да стабилизифра систем кој, според него, не постоел.
На настанот во Прилеп изјави за медиумите дадоа и градоначалникот Дејан Проданоски и вицепремиерот и министер за транспорт Александар Николоски.
Додека премиерот одговараше на прашања, некој од присутните изгуби свест, па Мицкоски праша дали е сè во ред, по што беше прекинат преносот од настанот.