Граѓаните не сакаат избори, сакаат реформи и континуитет на процесите, кажа денеска премиерот Христијан Мицкоски пред учеството на Амбасадорскиот совет.
„Ние како коалиција имаме добиено легитимитет од граѓаните за да бидеме влада четири години, но доколку опозицијата мисли дека се потребни предвремени избори, се разбира дека ние како кукавици нема да седиме настрана, туку ќе одговориме на тоа барање позитивно и се разбира дека ќе ги победиме“, кажа тој одговарајќи на новинарско прашање.
Премиерот на повеќе наврати во текот на оваа година зборува за предвремени избори. Во февруари рече дека избори ќе има кога граѓаните ќе посакаат да има, па потоа во мај посочи дека оваа година сигурно нема да има избори. Летово, пак, неколку пати предвремените избори се дневна тема во медиумите по изјави на премиерот Христијан Мицкоски.