По успешната минатогодишна соработка, Емин и Тристано повторно се обединуваат на сцената на еден од најугледните европски оркестри.
Бамберг повторно му ја довери диригентската палка на Џијан Емин, кој заедно со Франческо Тристано ќе приреди музичко патување од Бах до нови авторски светови. Македонскиот диригент Џијан Емин повторно ќе застане пред еден од најпрестижните европски оркестри – Бамбергер Симфоникер, потврдувајќи ја својата сè поцврста позиција на меѓународната музичка сцена. По исклучително успешната соработка минатата година, овој четврток во Бамберг, Германија, Емин повторно ќе ја дели сцената со светски реномираниот пијанист, композитор и продуцент Франческо Тристано, во проект што ветува возбудлива средба на музички епохи, идеи и авторски сензибилитети.
Програмата е осмислена како дијалог меѓу минатото и сегашноста, меѓу канонот и современата креативност. Публиката ќе има можност да слушне дела од Јохан Себастијан Бах, Морис Равел и Чарлс Ајвс, но и премиерни композиции создадени специјално за овој проект од Џијан Емин и Франческо Тристано.
Токму во оваа необична програмска поставеност лежи особеноста на концертот. Делата на Бах, Равел и Ајвс добиваат нов контекст преку современи авторски интервенции, отворајќи простор за нови значења и звучни перспективи. Наместо едноставно претставување на класичниот репертоар, проектот нуди жива и динамична комуникација меѓу различните музички светови, во која традицијата не е музејски експонат, туку инспирација за создавање нова музика.
„Голема чест е повторно да работам со Бамбергер Симфоникер и Франческо Тристано. Ова е проект што не само што ги спојува различните музички епохи, туку отвора и нови креативни перспективи преку авторска музика создадена специјално за овој состав и оваа програма“, истакнува Емин.
Фактот што Бамбергер Симфоникер повторно го поканува македонскиот диригент е уште една потврда за неговиот меѓународен углед и препознатлив авторски и изведувачки сензибилитет. Во изминатите години, Емин оствари бројни значајни настапи и соработки низ Европа, претставувајќи ја македонската музичка култура на сцени каде настапуваат најдобрите светски уметници и ансамбли.
