Во 2026 година, во Македонија се регистрирани вкупно 58 случаи на западно-нилска треска. Од регистрираните случаи 54 се водат како потврдени, а четири како веројатни, наведено е во неделниот извештај што го објави Институтот за јавно здравје (ИЈЗ).
Според место на живеење на заболените, 55 случаи се од Скопје, а по еден случај е од Велес, Куманово и Свети Николе.
„Регистрирани се 57 автохтони случаи и еден случај со историја на патување во Грција, но инкубацискиот период покрива и престој во Македонија. Од регистрираните случаи, 46 или 79,3% се машки, а 12 или 20,7% се женски.
Во однос на возрасната дистрибуција, најголем дел се лица на возраст над 60 години – 47 (81,0%), седум се лица на возраст од 50-59, едно лице на возраст од 30-39, а три лица на возраст од 20-29 години“, пишува во извештајот.
Почетокот на симптомите кај најголем дел од заболените е регистриран во месец август. Кај 17 лица почетокот на симптомите е во месец јули, два во месец јуни, а кај еден случај во месец мај.
„Сите заболени со невроинвазивна болест (56) биле хоспитализирани, 55 во УК за инфективни болести и фебрилни состојби и еден во Аџибадем Систина. Испишани се 43 од хоспитализираните потврдени случаи, а сè уште на лекување се 5 лица. Починати се 8 од хоспитализираните потврдени случаи. Просечното траење на лекувањето кај испишаните и починатите лица е 14 дена“, пишува во извештајот.
Во текот на 2026 година, до завчера, регистрирани се 8 смртни случаи кај пациенти со невроинвазивна болест на ЗНТ, со леталитет од 13,8% од регистрираните потврдени случаи. Сите починати лица се од машки пол. Просечната возраст на починатите лица изнесува 71,9 години. Сите починати лица се од Скопје и сите починати лица биле хоспитализирани. Кај седуммина се регистрирани коморбидитети.