Информацијата ја потврди високата претставничка на ЕУ за надворешна политика и безбедност Каја Калас, во изјава дадена во име на Европската Унија. Станува збор за Одлуката (ЗНБП) 2026/1882 на Советот на ЕУ од 30 јули со која беше извршена редовна ревизија на листата на лица, групи и субјекти опфатени со европските рестриктивни мерки за борба против тероризмот.
Советот при ревизијата утврдил дека постојат основи мерките да продолжат да се применуваат кон лицата, групите и субјектите кои се наоѓаат на листата. Затоа имињата од постојниот список се задржани.
Со одлуката од 30 јули не е воведена нова антитерористичка листа, ниту се додаваат нови имиња како резултат на оваа конкретна ревизија. На листата се наоѓаат физички лица и организации кои ЕУ ги смета за поврзани со извршување, обид за извршување, учество или олеснување на терористички акти.
Меѓу организациите наведени во анексот на одлуката се Хамас, военото крило на Хезболах, Исламскиот револуционерен гардиски корпус (IRGC), Работничката партија на Курдистан (PKK), Палестинскиот исламски џихад (PIJ), Популарниот фронт за ослободување на Палестина (PFLP), Абу Нидал организацијата, Ал-Акса маченичката бригада и други организации.
Со оваа одлука се усогласија и Исланд, Лихтенштајн, Молдавија и Украина.
Рестриктивните мерки на ЕУ, зависно од конкретниот режим на санкции, можат да опфаќаат замрзнување средства и имот, забрана за ставање средства на располагање на санкционирани лица и субјекти, како и други ограничувања предвидени со европското законодавство.
За Македонија ова е уште едно усогласување со одлука на ЕУ во рамките на Заедничката надворешна и безбедносна политика. Во текот на 2026 година Македонија заедно со другите земји од Западен Балкан повеќепати се усогласуваше со одлуки на Советот на ЕУ за различни режими на рестриктивни мерки. Во мај Македонија, Албанија, Црна Гора, БиХ, Исланд, Молдавија и Украина се усогласија со одлуката на ЕУ за продолжување на рестриктивните мерки поврзани со ситуацијата во БиХ до 31 март 2027 година. Во јули, Македонија, Србија, Албанија, Црна Гора, БиХ, Исланд, Лихтенштајн, Молдавија и Украина се усогласија и со други одлуки на ЕУ за рестриктивни мерки, меѓу кои и мерките поврзани со ситуацијата во Либан.