Иако сезоната на грип е веќе во ек, граѓаните сè уште не можат да се пријават за бесплатна вакцинација против сезонски грип преку платформата vakcinacija.mk. На веб-страницата сè уште стои известувањето „Пријавувањето за вакцинација за сезонски грип е завршено“, без можност за поднесување нови пријави. Денеска министерот за здравство Сашо Клековски, кажа дека пријавувањето мора да се одвива преку „Мој термин“, но електронско пријавување преку платформата засега е оневозможено. Останува неизвесно, од кога заинтересираните граѓани ќе можат да се пријавуваат за вакцина.
Клековски информира дека првите 30.000 вакцини против сезонски грип се пристигнати, а вакцинацијата треба да започне во периодот од 16 до 25 октомври.
„Втората тура од 26.000 вакцини треба да пристигне до 15 ноември. Во моментот ја организираме логистиката со центрите за јавно здравје и мое очекување е дека во овие стандардни термини ќе почне вакцинацијата во земјата, а тоа е од 16 до 25 октомври“, рече тој и кажа дека ќе бил првиот што ќе се вакцинира за да го поттикне пријавувањето.
Мета минатата недела пишуваше дека нема можност за електронско пријавување за вакцина иако сезоната нагрип е веќе во ек. Образложението за доцнењето од надлежните беше дека сите три соеви на сезонски грип се нови соеви, што значи дека производителите во Европа и на другите места започнале со задоцнето производство.
Во земјава, сезоната на грип епидемиолошки се следи од 40 календарска недела што вообичаено се паѓа на почетокот на октомври и трае до 20 недела од следната година, односно до мај.
Лани, Министерството за здравство набави 80 илјади дози четиривалентна вакцина од производителот „Абот“ од Холандија. Само во првата половина на октомври лани, за примање вакцина се пријавиле 49 илјади граѓани и само во првиот ден кога започна вакцинацијата, во земјата се вакцинирале 2.000 граѓани.
Со бесплатната вакцинација се опфатени ризичните категории население, како што се повозрасни лица над 65 години, лица со хронични заболувања, здравствени работници, бремени жени, деца на возраст од 6 месеци до 5 години, како и лицата сместени во установи за социјална заштита на стари лица и вработените во овие установи.