Во Гостивар има епидемија на гастроентеритис. 1.500 регистрирани случаи со исти симптоми и најмалку уште 5.000 кои не се јавиле на лекар, а тоа значи дека треба да се прогласи епидемија, реагираше вчера микробиологот проф. д-р Никола Пановски во објава на Фејсбук.
„Во еден град оболеле 30 отсто од населението од иста болест и нема услови за прогласување на епидемија. Ова не е политика, епидемиолозите треба да реагираат. Ако прашаат студент на испит „Дали е епидемија, ако во еден град за 5 дена заболеле 30 отсто од населението со исти симптоми?” Ако одговорот е „Не”, студентот ќе падне на испит. Нека им го кажат ова на здравствените власти. Епидемија масовна во овој случај постои“, напиша Пановски.
Пред неколку дена, инспекторите на Агенцијата за храна и ветеринарство, заедно со полицијата и претставници на Министерството за животна средина утврдиле дека во главниот цевковот нелегално е поставена пумпа која директно вбризгува вода од реката Вардар.
Министерот за здравство Сашо Клековски вчера при посетата на гостиварската болница кажа дека за едно деноноќие во болницата биле примени 260 лица со стомачни тегоби, од кои 100 на детскиот оддел и 160 на инфективниот оддел.
„Првите случаи во болницата се регистрирани на 13 јули, во доцните ноќни часови, иако се можни претходни индивидуални случаи. Вкупниот број надминува илјада пациенти“, кажа тој.
Сите пациенти имаа стомачни проблеми (дијареја, повраќање), некои со треска (температура) и дехидратација. Се третираа со инфузии (за дехидратација) и симптоматски, а најголемиот дел се упатуваа на домашно лекување. Три деца се задржани на набљудување. Пациентите се од сите возрасни групи, најмногу деца и возрасни со коморбидитети. Повеќето се од Гостивар, но и од околните населени места Вруток, Чегране, Чајле, Дебреште.
АХВ издеде забрана за употреба на водата за пиење во Гостивар бидејќи откриле пумпа која директно бризгува вода од реката Вардар во системот. Пред околу три недели, надлежните од општина Гостивар на нивната Фејсбук страна известиле дека водата не е безбедна за пиење бидејќи преземале активности за подобрување на притисокот во водоводната мрежа.