Како што соопштија од собраниската делегација, Костадиновска-Стојчевска на 7 септември присуствувала на состанокот на Комитетот за следење на обврските и ангажманите на земјите членки на Советот на Европа, на кој биле разгледани прашања поврзани со исполнувањето на обврските на државите членки, состојбите во Грција и тековните постмониторинг процеси.
На денешниот состанок на Комитетот за правни прашања и човекови права, одржан во Канцеларијата на Советот на Европа во Париз, во фокусот биле прашања од областа на човековите права, владеењето на правото и меѓународното право.
Меѓу главните точки на дневниот ред било прашањето за спроведувањето на пресудите на Европскиот суд за човекови права од страна на Руската Федерација, вклучително и исплатата на досудениот надомест. Во таа насока биле разгледани предлог-извештај, како и предлози за резолуција и препорака.
Комитетот расправал и за заканите кон Меѓународниот кривичен суд, при што биле разгледани соодветни предлог-извештаи, резолуции и препораки. Членовите на Комитетот усвоиле и декларација со која се повикува да не се глорифицира осудениот воен злосторник Ратко Младиќ.
На седницата биле отворени и повеќе теми поврзани со заштитата на човековите права, меѓу кои состојбата во Северен Кавказ, пријавените случаи на политички затвореници во Европа, заштитата на бранителите на човекови права и независните новинари во Азербејџан, како и активностите на Советот на Европа во однос на мигрантите, барателите на азил и бегалците.
Комитетот го разгледувал и прашањето за незаконското задржување на палестински деца од страна на Израел, како и подготовките за идната конвенција на Обединетите нации за спречување и казнување на злосторствата против човештвото. Во рамки на оваа точка било одржано сослушување со експерти и била разгледана предлог-резолуција за натамошното учество на ПССЕ во процесот.
Дел од дискусиите биле посветени и на растечките закани за медиумскиот плурализам и независноста на медиумите, при што комитетот го одобрил своето мислење по ова прашање.
На состанокот биле разгледани и мерки за зајакнување на заштитните механизми против злоупотреба на стоки со двојна намена од страна на авторитарни режими, како и активности поврзани со претстојниот самит на Советот на Европа и Светскиот форум за демократија 2026.