Договори за грант од 149 милиони евра преку Инвестициска рамка за Западен Балкан на Европска Унија и по 175 милиони евра кредити од Европската инвестициска банка и Европската банка за обнова и развој беа потпишани денеска за реализација на третата фаза од железничката делница Крива Паланка – почеток на прекуграничен тунел со Бугарија како дел од железничкиот Коридор 8.
Премиерот Христијан Мицкоски истакна дека на реализација на проекти се чека повеќе од 30 години, а најважно е што е постигнат договор со Бугарија за да не заврши на половина тунел туку ќе биде функционално решение кое ќе биде додадена вредност за македонската економија.
„Продолжуваме да го заокружуваме процесот на Коридорот 8. Во делот од реформската агенда можам да кажам дека делот од Скопје до Гостивар, преку Јегуновце и Тетово, ќе биде опфатен во делот на финансирањето со модернизација и електрификација. Претставникот од Европската инвестициска банка спомна и за делот од Коридорот 8 којшто треба да ги поврзе Гостивар – Кичево – Струга – границата со Албанија, но тука мораме да бидеме внимателни со препораките коишто ги даде УНЕСКО. Нас ни е значајно Охридско-струшкиот Регион да остане природно и културно светско наследство коешто ќе биде заштитено од страна на УНЕСКО, рече Мицкоски.
Заменик-претседателот на Владата и министер за транспорт, Александар Николоски, истакна дека станува збор за еден од најзначајните инфраструктурни проекти за државата и за реализација на стратешката визија Македонија да стане клучна транспортна раскрсница на Балканот. Тој потсети дека договорот со Бугарија бил потпишан минатата година, а минатата недела во Софија се одржал првиот меѓуресорски и меѓувладин состанок, додека вториот се очекува до крајот на месецот во Скопје.
„Двете држави испраќаат заедничко писмо до Европската Унија, Европската банка за обнова и развој и Европската инвестициска банка, за обезбедување грант средства за изградба на прекуграничниот железнички тунел, кој што сум убеден ќе бидат поголеми од оние за кои досега се зборуваше. Тоа се средства со кои што знаеднички ќе може да се реализира овој проект”, додаде Николоски.