Премиерот Христијан Мицкоски не потврди дека Димитар Димовски ќе биде именуван за секретар за добро владеење во Владата, откако во медиумите се појавија информации дека токму тој би можел да ја добие таа улога.
Владата, во рамките на кабинетот на Мицкоски, ќе треба да одмерува дали министрите или други функционери добро и примерно владеат, откако беше укинато вицепремиерското место со таква надлежност кое досега го држеше Арбен Фетаи.
Како можен носител на таа функција во јавноста се споменува токму Димовски, кого медиумите го поврзаа со Мицкоски како човек од доверба. Како што објави опозицијата, Димовски бил дел од истрага на поранешното Специјално јавно обвинителство (СЈО).
Тој е условно осуден за злоупотреба на службена положба и овластување во случајот „Топлик“, кој се однесува на продажбата на државно земјиште во „Сончев град“ во Сопиште.
Членот на Извршниот одбор на СДСМ, Јон Фрчкоски, јавно праша како е можно „лице условно осудено за злоупотреби“ и бизнис партнер на Мицкоски да биде задолжено за добро владеење, борба против корупцијата и судир на интереси.
Фрчкоски на прес-конференција рече и дека Мицкоски „прво го постави до себе во Владата како секретар за јавни политики, сега го унапредува“, додавајќи дека тоа според СДСМ отвора прашања за кадровските решенија во кабинетот.
Мицкоски, пак, пред новинарите во Бутел кажа дека никаде не рекол кој ќе биде човекот што ќе го управува делот за добро владеење. „Нема да биде истото лице“, рече тој, додавајќи дека Димовски е секретар за јавни политики, координација и следење на реализацијата на програмата на Владата, а дополнително ќе именува секретар за добро владеење.
Истовремено, премиерот за Димовски рече дека бил предмет на политичка хајка на СЈО и дека нема да го коментира повторно.