Американската авторка и консултант за образование, Ена Хомајун, која им помагала на студентите да се запишат на елитни универзитети, вели дека најважниот индикатор за успех кај децата не е коефициентот на интелигенција.
Наместо тоа, таа тврди дека извршните функции, кои вклучуваат способност за планирање, организирање, управување со времето, самоконтрола и одржување на вниманието, се клучни.
„Вештините за извршно функционирање се збир на когнитивни вештини кои ни помагаат да се фокусираме, организираме и управуваме со емоциите. Кога ќе ги научите овие вештини рано, ќе бидете подобри во справувањето со одговорностите и формирањето значајни односи“, вели Хомајун за CNBC.
Таа објаснува дека децата кои ги развиле овие вештини имаат поголема веројатност полесно да ги завршуваат задачите, подобро да се справат со предизвиците и поефикасно да ги управуваат своите одговорности. Од друга страна, децата кои имаат висок коефициент на интелигенција, но слаби извршни функции честопати имаат тешкотии во училиштето и секојдневниот живот.
Според неа, родителите обрнуваат премногу внимание на оценките и тестовите, а премалку на развивањето на овие клучни животни вештини. Таквиот пристап може да го ограничи долгорочниот успех на децата.
Се нагласува дека извршните функции можат да се развијат преку вежбање и секојдневни активности, особено ако родителите ги охрабруваат децата да бидат независни, одговорни и организирани.