Винисиус Жуниор повторно предизвика контроверзи поради замена. Овојпат не пред очите на „Сантијао Бернабеу“, туку пред очите на своите 57 милиони следбеници на Инстаграм. Лут поради свирежите што ги слушна при излегувањето од игра, Бразилецот веднаш по завршувањето на натпреварот Реал Мадрид – Севиља (2:0) ја смени профилната фотографија на Инстаграм, пишува Marca во текст со наслов „Кавгата на Винисиус пред очите на 75 милиони следбеници“.
Само десетина минути по последниот судиски свиреж, директно од соблекувалната, тој ја отстрани фотографијата на која држи дрес на Реал и ја замени со слика од натпревар во дресот на бразилската репрезентација. „Седмицата“ на Реал го напушти теренот во 83. минута, проследен со свирежи, но и со по некој аплауз од дел од навивачите, што јасно ја покажа поделбата меѓу публиката.
Неговиот брз потег на социјалните мрежи дополнително ги разгоре тензиите во односот со навивачите на „Бернабеу“. Покрај тоа, објави и две фотографии од натпреварот против Севиља, придружени со три точки. Интересно, промената на профилната фотографија ја направи толку брзо што во неговите Инстаграм приказни, додека ги споделуваше тие фотографии, сè уште се гледаше старата слика со дресот на Реал.
Крајот на 2025 година Винисиус не го дочекува во најдобра атмосфера. Односот со навивачите на Реал и тренерот Чаби Алонсо е далеку од идиличен. Свирежите што ги доби против Севиља се одраз на незадоволството од неговото однесување низ сезоната. Гестикулациите кон Чаби за време на Ел Класико беа пресвртна точка, а ниту подоцнежните инциденти не му помогнаа.