Поради хаваријата со пукната топловодна инсталација и поплава во зградата на некогашна „Нова Македонија“, државните институции коис е сместени таму ќе работат од дома. Владата на вчерашната седница ја разгледа информацијата за состојбата и со оглед на последиците, особено продирањето на вода во дел од електричните инсталации, како и потребата од спроведување на сите неопходни технички и безбедносни проверки пред повторно ставање на објектот во редовна функција, донесе заклучок со кој се препорачува на институциите сместени во објектот да го реорганизираат своето тековно работење односно вработените привремено да ги извршуваат своите работни обврски преку работа од дома, без физичко присуство во зградата
Во зградата на „Нова Македонија“ се сместени осум државни институции, меѓу кои и Министерствата за образование, за локална самоуправа, за јавна администрација, Државниот просветен инспекторат, Комисијата за заштита од конкуренција и Управата за водење матични книги.
„Оваа мерка се презема исклучиво од превентивни и безбедносни причини, при што приоритет останува заштитата на здравјето и безбедноста на вработените, паралелно со непречено продолжување на работните процеси и функционирањето на институциите. Надлежните служби интензивно работат на санација на последиците и на создавање услови за безбедно и целосно враќање на вработените во објектот“, информираат од Владата.